د وسله والو طالبان مشر ملا محمد عمر ووژل شو

يوې افغان امنيتي سرچينې، چې نه يې غوښتل نوم يې په رسنيو كې واخيستل شي، ويلي، چې د وسله والو طالبانو مشر ملا محمد عمر پاكستان كې ووژل شو. دغې امنيتي سرچينې رسنيو ته ويلي، چې ملا عمر څو ورځې دمخه د كوټې او شمالي وزيريستان پر لاره وژل شوى دى. د سرچينې د معلوماتو له مخې د پاکستان استخباراتي ادارې اى اېس اى د خپل پخواني مشر جنرال حميد ګل په وسيله غوښتل، چې ملا عمر له کويټې څخه شمالي وزيرستان ته انتقال کړي، چې پر لاره د اى اېس اى او سراج الدين حقاني ډلې لخوا ووژل شو. يادې سرچينې زياته کړې، چې پاکستان غوښتل ملا عمر د افغانستان پولې ته څېرمه په کومه سيمه کې ووژني، څو نړيوالو ته وښيي، چې ملا عمر د پاکستان په ښاري سيمو کې نه اوسېده. تر اوسه رسمي سرچينو د ملا عمر د وژل کېدو پخلى نه دى كړى. د امريکا جمهور ريئس بارک اوباما پرون په يوه مرکه کې ويلي وو، چې که پاکستان کې د القاعدې د کوم مشر يا ملا عمر د شتون په اړه معلومات ترلاسه کړي، نو يو ځل بيا به په دغه هېواد کې خپلسري عمليات ترسره کړي.