د کابل پر نړیوال هوایی ډګر راکټی برید وشو

د کابل پر نړیوال هوایی ډګر تېره شپه پنځه توغندی وتوغول شول، خو هېڅ ډول زیان یې نه دى اړولى. دا برید په داسې حال کې کېږی، چې نن د نړیوال کنفرانس کوربه دى، چې تر 70 د زیاتو هېوادونو او نړیوالو موسسو استازی ورته رابلل شوی دی. د کابل هوایی ډګر د سرحدی پولیسو قوماندان مل پاسوال محمد اصف جبارخېل رسنیو ته وویل، چې پر هوایی ډګر د شپې شاوخوا 11 بجې برید وشو. د نوموړی په وینا، له دغو توغندیو څخه دوه یې د هوایی ډګر په منځ او درې نور یې له هوایی ډګر څخه د باندې، قصبې ته نږدې ریګ رېشن سره لګېدلی دی. هغه وویل، چې تراوسه د توغندیو د توغولو ځاى نه دى معلوم شوى. د نوموړی په وینا، له هوایی ډګر څخه د باندې لګېدلو توغندیو څخه یو نه دى چاودېدلى. طالبانو، د کابل پر هوایی ډګر د برید مسوولیت پر غاړه اخیستى دى.